“Kapuz z vovcon” je stranica koju na Facebooku prati 26 tisuća profila, što je zaista brojka koja označava ozbiljnu kvalitetu objave sadržaja, barem kad su lokalne teme u pitanju.
Danas je objavio novi „post“ kojeg masovno dijele ljudi iz Istre, a dojam je da je autor baš pogodio u metu.
„Božićna čarolija“. Ča je to?
Svaki dan to čuješ na radiju, televiziji. Ta čarolija nas je toliko „začarala“ da svi moramo imat dide mraze, patuljke, 200 bori, i miljun lanpadin nabanderano u i vokoli hiže – a u frižideru nimaš kilu domaćih kobasic i litru domaće bilice. A kad to sve lipo učeniš, sideš u auto, pasaš svaki advent od Pomera do Karigadora. Dojdeš, vidiš montani šator, zgoriš zajik na kuhano vino, buljiš u une lanpadine kako u majku bojžu, slomiš zube na trde fritule, pojideš kobasicu zmišanu od čokolina i arbašpanje, poslušaš kakove mužikante z Crklade i poješ doma zlejen z 2 dinara u žepu. Pole tega te pripada jedan fotošuting z famejon, pićetu obučeš čagod ti dojde prvo pod ruku a malemu rokiju šivano odjelo po miri. Sidete doma, svaki na svoj mobitel, ne pominjete se, nedaj bog da bi se pošlo na mašu, ku niš drugo baren da daš ruku kemu i da si rečete 2 lipe beside. Sve smo zatrli, sve naznopako. Čast iznimkama, ali koliko rivan kapit, kolektivno gremo zazdolu napro brzo a freni su nan sve slabiji.
Ki more, hote poli noneta i none da malo ozdravite. Igrajte briškulu, naložite ognjište, obrnite kus žlomprta, popite si rakijicu, poslušaj štoriju od oca za plovana i Mariju z Perini, budi z famejon, z pretelima. Poklonite jedan drugemu 10 menuti vrimena i čuda ste učenili.
