Vijest o pljački Istarske kreditne banke 25. ožujka 2025. godine razlila se pazinskom kotlinom kao munja.
I dok su neki posprdno komentirali kako je Pazina sama što se tiče pljački prestigli obijanje bankomata u Žminju, drugim pak nimalo nije bilo do smijeha. Krenuli su dobro poznati pazinski tračevi, teorije i inspekcijski nalazi, „kad je ki ča kemu reka i zaš”. Najednom po dobro poznatoj špranci, svi znaju sve.
Nestala je nekima od njih cjeloživotna ušteđevina, kako su rekli u intervjuu danom Jutarnjem listu, objavljenom u nedjelju, 8. lipnja 2025. godine. U tom su intervjuu spomenute sve instance koje su potrebne, osim samih pljačkaša banke.
Reci koji slijede potpuno su izmišljeni, i zaista se nadamo da ih nećete shvatiti ozbiljno. Izmišljeni je intervju izrađen jedino u svrhu zabave!
Zvonio je telefon, kao što i inače zvoni kad netko treba novinarske usluge. Pljačkaši će imati oznaku P, Kampanja oznaku K.
P1: Dobar dan, smo dobili Kampanju?
K: Jeste, izvol’te.
P1: Ma vas zovemo u vezi ovega članka ča je za ša u Jutarnjen. Svi su pokriti – i ove ča smo pokreli i banka i policija, a nas niki nič ne pita. Kako da smo važi od piture!
K: Ne razumijem, kakvi pljačkaši, o čemu pričate, o čemu se radi, što vi želite?
P1: Porka mare, ča ne znaš da je opljačkana banka poli Geme? Kadi vi novinari živite? Ili ne smite pisat, aš bi vas uhapsili da ste hi vi pokreli? Za kega vi uopće delate? Mi bimo anke stili naših pet menuti slave! Ča bimo se mogli nać poli nas u lišeri, da jeno malo poćakulamo okoli tega?
K: Mmmmože, za pola sata?
P1: More, ćemo van poslat geolokaciju na Vocap.
Nakon dobivene geolokacije zaputili smo se u obližnje selo u okolici Pazina. Kako ne bi ometali policijsku istragu, nećemo navoditi točne lokacije ni točne ljude. Dočekala su me četvorica muškaraca s kapuljačama na glavi, u lišeri, a zapravo bloketari koja je puno ljepše uređena iznutra nego izvana. Osim kobasica, tu je lijepo uređena napa, neki pehari s boćarskih turnira, bukalete s natpisima o kojima ne smijemo pisati, erotski kalendar te plakati Lidije Bačić s koncerata u Roču i Festivala pulaštri u Funčićima.
K: Dobar dan, vi ste me malo prije zvali? Molim da mi kažete o čemu se radi, nije mi jasno zbog čega ste me zvali.
P1: Ma glej, zvali smo te aš ni pošteno, da svi sve znaju o toj pljački, a da nas niki niš ne pita.
K: Dobro, znači vi tvrdite da ste opljačkali Istarsku kreditnu banku u Pazinu?
P1: Smo! I bimo stili intervju!
K: Pa dobro, krenimo! Podaci o pljački su uglavnom poznati, molim da se sva četvorica uključite u raspravu i odgovarate na pitanja. Neće biti objavljeno ono što ne želite.
P1: Mi bimo anke stili samo inicijale, osim ovega u kantunu, aš on dela u javnen poduzeću.
K: OK, krećemo. Očigledno je da je pljačka pomno planirana i izvedena od početka do kraja. Pljačka je nazvana pljačkom stoljeća. Koliko ste godina planirali ovu pljačku?
P1: Ma svi smo mi delali na Purisu i hodili u restoran koji je prvo bi tamo prije banke, na marende. Neke pute bimo još kega i dopeljali. A ovaj iz javnega poduzeća je jedanput dopelja anke ljubavnicu, pa mu je konobarica rekla da dobro oni znaju ki dela na Purisu, ki ne.
K: Dobro, to sad nije bitno!
P1: Ni, ali je bitno aš smo znali kako je uzidan restoran i kad su ga pregrađivali, trdo smo se napili s knauferi poli Serđeta na kantunu, kat je neki zvadi rimonike i poče sos. Nan je povida ke pregrade su delali, kakove su, ot čega i da će u jenen partu doć nova oštarija, u drugen banka. Znači, mi delavci smo jopet pofumali.
P2: Ja bin se samo nadoveza, da smo se jeno malo nasmijali kat smo čuli kako su to storili. Ni baš neka kvalita – ne. Prvo nan je bilo za čut – ma ča ste munjeni.
P3: Od nas nikad niki nič ni ukra u životu! Dobro, osin par konjaki u staroj samoposlugi. Ali, to su si delali.
P4: (svi se otvaraju odjednom, čak i gospodin iz javnog poduzeća) I znaš ča, mi nismo nikovi pljačkaši! I nemoj nas više tako zvat, dio kan! Tr nismo pokreli onega ki nimaju, nego one ki imaju!
P1: To su svi lipo rekli i va intervjue – ne jade se oni nas ča smo in pokreli, aš to bi svaki pametan stori! Pročitaj još jedanput, nanke besede grdega za nas! Samo su tukli po banke ča in ni osigurala šolde i to drugo ča su imali. A vero je bilo tega! (odjednom se svi počnu grohotom smijati)
P2: Ali znaš ča, ovaj ča dela u javnen poduzeću, je jeno malo ženskar, i kat bi preko Tindera namami kakovo samico, bi je popelja u Gemu, aš i nimaš jako kamo u Pazinu! Koliko se je tajsti tiramisui natuka, to ti i ja nismo videli z očimi. Ali, saki put je da ne bude sumnjiv, jeno malo pokucka po zidiću kat bi nešto objašnjava. Znaš, ono da pokucan u drvo simo, da pokucan tamo, taj se je nakucka.
P3: A znaš kako je u Pazinu, ljudi ne znaju mučat, a i sve se dozna pomalo. Ki dela kakovo delo, pa hitiš malo u računicu, čin vidiš da pelje bolju vituru, pa kadi držiju ti ljudi te šolde. Aš znaš kako je, plaćaš porez koliko rabi, ali ne rabi za sve. Vajk treba nešto puštit za stare dane ili za ne znan kat ti rabi.
P4: A i na pijano ti ljudi sve povidaju, ne moreš to držat. A neki se voli jeno malo i pohvalit – znaš da poli nas ljudi vole nove hiže za odmor, nove veture, voli poć kamo… Neke pute biš reka da sve to i delaju, samo da se moru pokazat.
K: Koliko ste dugo planirali ovu akciju?
P1: Eko drago nan je da više ne ćakulaš o pljački. Ćemo jenu supu? More. (I pruži bukaletu na kojoj „Ni bogat uni ki puno ima, nego uni kemu malo rabi”, iako smo ga odbili, nismo se mogli ne nasmijati.)
P2: Uglavnon da ti ne povidamo ki nan je reka za ti zid. Ali smo se deboto par let škercivali na to. Trd si kako zid u Geme! Eko, to nan je bila poštapalica.
K: Ok, razumijemo za zid, ali kako ste saznali tko drži novac u banci i u kojim sefovima?
P3: A malo smo se raspitali. Ali ča je u Pazinu tajna, da ovi ča vrte velika dela, da imaju puno šoldi. To stvarno ni tajna. Samo je te šolde trebalo skužit kadi drže i kako se ponašaju. Poć par puti u Gemu.
P4: Ma nismo mi šli ukras te šolde nekemu ki hi nima, to je jasno. A verujemo da hi nismo ni pobrli nekemu kemu jako fale.
K: To nikad ne znate. Ljudi su radili i šparali cijeli svoj život i sad su ostali bez ušteđevine. Odakle vam hrabrost da uđete preko Geme, to napravite stotinjak metara od policije?
P2: Ma to je bila idealna pozicija, gema je u zgradi kadi ni judi. To ča je policija blizu ni neka drama, aš je z druge strane zgrade. Tamo i anke ku ki ča čuje neće posumnjat, će mislit da ovi iz Geme nešto delaju. A za razbit ta zid, ni rabilo čuda ne. Samo ča smo mi jeno malo debeli već, pa je samo ovaj ča dela u javnen poduzeću moga se prorivat.
P4: Ma dobro, znali smo od kega uzimamo šolde, tr su i sami ti direhtori rekli – ne zimamo judima ki delaju za miljar i dvisto euri na misec. Nas četiri i inače smo preteli i delamo jedan za drugega sve ča rabi. Ne gre nan loše u životu. I to ča smo zeli, nismo zeli samo za nas, već i za naše fameje, za našu dicu, za staros naših noneti, da malo bolje živimo. Nama stvarno ne rabi čuda.
K: Dobro, ali kako ćete sada tajiti da imate taj novac. I što ako vas policija uhvati?
P1: Ma to se vajk more desit. Ali glej, mi nismo kao oni iz Ekonomske analize z Rašanove ča su maznuli šolde i pošli u Mehiko pred cirka deset let, ni kako onaj Brandelize devedesetih ča je naobećiva vraga i boga. Mi ćemo ostat tu, i ku nas ćepaju, će nas ćepat.
P2: Ali, niki osim onih čigovi su šoldi ne zna jušto koliko je bilo. Ako nas ćepaju, mi ćemo vajk priznat samo jedan kus šoldi. Tako će bit najbolje za sve. Šoldi za seh! (hahahhahaa, čuje se smijeh)
P3: A od nas četiri se niki ne bude polakomi ne. Sad će mo moć gambjat krov na stare hiše, forši će ki nonu stavit u dom, ili otroku moć platiti na miru stan da študija.
P2: Ja moran i novu septičku storit!
P4: Eko kapiš, sve je na sigurnen, mi ćemo po malo trošit te šolde, ali hi nikad nećemo javno se kurčit da hi imamo, nanke kupovat skupe viture.
P1: To je zajno bi dogovor, ne gambivamo naše živote radi tega. Malo veći luksuz, to ja. Forši ljetovanje u Hrvatskoj kadi na kakoven otoku (čuje se smijeh) ili kakovu operaciju poli privatniki, ja si moran poć poli Udovičićke zube storit. Ali, čin bimo sad počeli nešto ekstra delat, to bi se zajno videlo va Pazine.
P2: A dobro, malo nan je i žal tih ljudi ča smo hi pobrstili, ali ča ćeš, znaš kako je. Ku ne gre drugajče, ćemo pošteno.
K: Sad polako perete svoju odgovornost. Ali je nećete moći oprati, bit ćete krivi ako vas uhvate.
P3: A znaš kako je. Ku nas ćepaju, će nas ćepat. Ali mi stvarno ne bimo da nan ki zameri.
P4: Ali tar vidiš da nan niki ni ne zameri, još bi nan judi i čestitali!
P2: Najraje bimo došli poli svakega i tornali mu koliko in rabi, a onaj višak zeli sebi.
P1: Ma glej, ku ti rabi cirka miljar i pol na mesec za preživit. Za leto dan je to oko 18 miljari, za dvajset let je to tristo i šezdeset miljari. A računaj da ćemo svi nastavit delat, ali ćemo imat ta višak da moremo na miru živit. Jedino ča moramo mučat, to drugo se ne bude gambjalo ne.
P3: A i delali smo to jako po skrito i na cito. Još će 25. marač predložit za Dan Grada Pazina, za pobjedu pravde nad nepravdon!
K: Ništa, hvala vam na ovom neobičnom intervjuu. Imate li još nešto poručiti za kraj?
P1: Prvo bimo se tili zahvalit na dolasku. Dio tih šoldi ćemo dat nazad, za školu, vrtić, stadion, folkloru, kornholu, kakov turnir, ku ki bude ča dela tako i pita, pa ćemo uplaćivat, malo po malo će se i to sve stopit.
P2: Mi smo samo steli reć da smo pošteni judi!
P3: I jena poruka svima – da ni bogat oni ki puno ima, nego uni kemu malo rabi!
P4: I ja peran da ću poć ća z poduzeća i otpret si obrt!
