Elvis Roša poznatiji kao Destić je dobro poznati Istrijan koji na društvenim mrežama promiče istrijanstvo, ali i čakavski govor pa je bilo najlogičnije s njim krenuti u našu novu novu rubriku „Ča smo mi“!
Imenjače, ili ženso kako bi rekli mi tu, moreš se malo predstavit ljudima ki prate Kampanju?
Ja sam Elvis Roša poznatiji pod nadimkom odnosno pseudonimom Destić, na društvenim mrežama već duže vrime odnosno skoro tri lita promoviram istarsku, i čakavsku kulturu.
Tako i aspekte koji vežu Istru sa ostatkom Hrvatske, i regije. Osim tega bavim se i animiranjem svojih možemo reći crtanih filmova na Youtube – u, popularno nazvanih countryballs ča predstavlja države u obliku loptica, i povijesnom temama u obliku predavanja, ili objašnjenja historiografskih pojmova, ili samo učenja povijesti na zabavan, edukativan način kadi mi je cilj podučiti mlade, i dicu, također predstavljam i moremo povidat’ “povijesni humor” za svakakove teme u svrhu obrazovanja, i humorističnog efekta.
Otkud je došla tolika ljubav prema Istri, našemu govoru, našemu čoviku i prostoru na ken živimo?
Ja tu jubav nosin ud kada san za se, jer san tu rojen, zgojen i od mojih sam to pokupija, kako svaki šlovik, ali kako mali mi to ni bilo važno, dok nisan doša stariji, jer kad šlovik dojde stariji on svoje počne štimati, jer zna da je to njigovo.
Još kad vidin da nas je malo ostalo, i da nima niki da to predstavi bilemu svitu svoju regiju, odlučija san se time baviti u slobodno vrime za svoju dušu prije svega, a sve je počelo jenim povijesnim videom o Prepadu na Pulu 1918. prije par lit na YouTube, di san začeja napro izražavati svoju istrijansku regionalnost.
Vidi se da jako voliš i povijest – ti je to bi najdraži predmet u školi? Ako ni, ka je? Ča si najmanje štima od predmeti?
Svakako je bija, ja tu jubav gajin još ud vrtića, jer se domislin da san kako mići sidija za kompjuteron, i istražva Egipat kroz Google mape, ili Wikipediju, ima sam i dosta časopisa, đornali posebno za temu Titanika koja me fascinirala ud malih nogah.
Ostvarija sam, i nike moremo reći uspjehe u školi po temu pitanju, jer san hodija na svakakova natjecanja, a nekad san verovali ili ne drža predavanja ili pomoga kolegami kad im je tribalo ča špjegati odnosno objasniti bin ja reka.
Teme ke načimlješ su često povezano s politikon, iako se u nju ne pačaš. Razmišljaš li o temu da jedan dan se rineš u te priče?
Tote ste jušti, svakako se ne pačan, ali nike stvari volin objasniti isključivo radi povijesnega konteksta, ja se oslanjan samo na Boga, i razum tako da kako bi rekli stari judi politiku neću u svoju butigu, jedino ko bude bila takova situacija da gren tim vodami, ali ja se tote ne vidin nikakor.
Da te niki pita zaš je Istra najlipši kus svita, ča biš reka?
Pa, mislin svaki kraj je ud Boga dan, jer je uva cila zemja stvorena ud njega, ali koliko je lipote svega svita u našoj Istri se malo kadi najde ne samo ud prirode, nego i ud dobrih judi, i to ča imamo tu sposobnost da spojimo sve dobre jude, dobrega srca, a u isto vrime znamo ča smo, i znamo za svoju viru, a moremo reći da se ritko kadi more najt takov kus zemje ud kamika, blata kuji nan je draži ud suhega zlata.
Hvala Elvis na odgovorima i vrimenu – kuraja!
Pogledajte ovu objavu na Instagramu.
